ՆԳ նախարարության ԱԻ պետական ծառայության կազմավորման 30-րդ տարեդարձի և փրկարար ծառայողի մասնագիտական օրվան նվիրված միջոցառումներին՝ Արցախի Հանրապետության նախագահ Արայիկ Հարությունյանի գլխավորությամբ մասնակցել են մի խումբ բարձրաստիճան պաշտոնյաներ, հյուրեր Հայաստանի Հանրապետությունից:
Միջոցառումների մեկնարկը տրվել է արցախյան պատերազմներում նահատակված փրկարար-ծառայողների պատվո հուշատախտակին և ծառայության հուշարձան-խաչքարի պատվանդանին ծաղիկներ խոնարհելուց:
Այնուհետև շարահրապարակում ԱԻՊԾ աշխատակիցներին ողջունել ու մասնագիտական տոնի կապակցությամբ շնորհավորել է Հանրապետության Նախագահը:
Արայիկ Հարությունյանն իր ելույթում նշել է, որ փրկարար ծառայության անձնակազմն այս տարիների ընթացքում անձնուրացությամբ է կատարել իր առջև դրված խնդիրները, ինչը միմիայն դրվատանքի է արժանի: Նախագահի խոսքով՝ իշխանությունները շարունակելու են գործադրել բոլոր ջանքերը ծառայության հնարավորությունների ընդլայնման ու արդիականացման, ինչպես նաև աշխատակիցների սոցիալ-տնտեսական կարիքների լուծման ուղղությամբ:
Ելույթով հանդես է եկել ՆԳ նախարար Կարեն Սարգսյանը: Հայտարարելով լռության րոպե, ներկաները հարգել են հայրենիքի համար իրենց կյանքը զոհաբերած հերոսների հիշատակը:
Անդրադառնալով փրկարարների կատարած աշխատանքին Կարեն Սարգսյանը ևս մեկ անգամ իր երախտագիտությունն է հայտնել ծառայության ողջ անձնակազմին, կենտրոնական ու տարածքային ստորաբաժանումների ծառայողներին, որոնք ջանք չեն խնայում ծառայելու հայրենիքին ու ժողովրդին: Նախարարը նշել է, որ յուրաքանչյուրի անձնվիրության արդյունքը՝ արտակարգ իրավիկճակների ծառայության հանդեպ հանրության վստահությունն ու հարգանքն է: -«Որևէ գնահատական չի կարող համարժեք լինել այն ամենին, ինչ Արցախի փրկարարներն արել ու անում են այս օրերին, մեր հայրենակիցներից ստանալով շնորհակալության ու երախտիքի բազմաթիվ խոսքեր: Դա հարգանքի ու վստահության արգասիք է: Փրկարարներն ամեն օր կատարում և վերահաստատում են Արցախի Հանրապետության Սահմանադրության 3-րդ հոդվածը՝ «Մարդը բարձրագույն արժեք է»»-ելույթի իր խոսքում ընդգծել է նախարար Կարեն Սարգսյանը:
ԱԻ պետական ծառայության տնօրեն գնդապետ Մեխակ Արզումանյանը, հակիրճ ամփոփել է ծառայության անցած ճանապարհը, կազմավորման 30 տարիները: «Կենտրոնական ու տարածքային ստորաբաժանումների բարեկարգ ու նորոգվող պայմանները, պարբերաբար թարմացվող տեխնիկական միջոցներն ու սարքավորումները, հաճախակի վերապատրաստվող կադրերը, յուրաքանչյուրիս սրտացավ ու արհեստավարժ մոտեցումը մի նոր որակ է հաղորդել ԱԻ ծառայությանը և այսօր ունենք մի համակարգ, որտեղ կենտրոնացված են արտակարգ իրավիճակների կանխարգելման, արագ արձագանքման և վերականգնման բոլոր ծառայությունները, իսկ յուրաքանչյուր աշխատակից գիտի իր դերը՝ ճիշտ գործելու և առավելագույնն անելու սահմանը»- միջոցառմանը նշել է Մեխակ Արզումանյանը:
Հանդիսավոր միջոցառմանը համակարգի մի խումբ ծառայողների Հանրապետության նախագահի հրամանագրով, ՆԳ նախարարի, Արցախի ու Հայաստանի Հանրապետությունների գործընկեր կառույցների ղեկավարների հրամաններով շնորհվել են պետական ու գերատեսչական մեդալներ, կոչումներ ու պարգևներ:
