Հայաստանի Հանրապետության Արտաքին գործերի նախարարությունն իր ցավակցությունն է հայտնել Հարավային Կորեային՝ Սեուլում տեղի ունեցած ողբերգության կապակցությամբ։
«Մենք ազդված ենք Սեուլում տեղի ունեցած հրմշտոցի ժամանակ զոհերի մասին ողբերգական լուրից։ Մեր խորին ցավակցությունն ենք հայտնում բոլոր նրանց, ովքեր կորցրել են իրենց սիրելիներին, իսկ վիրավորներին մաղթում ենք շուտափույթ ապաքինում»,- ասված է հաղորդագրությունում։
Նշենք, որ Հարավային Կորեայի մայրաքաղաք Սեուլի Իթհևոն թաղամասում, որտեղ կան բազմաթիվ գիշերային ակումբներ, ռեստորաններ և սրճարաններ, տեղի է ունեցել զանգվածային հրմշտոց՝ դառնալով ավելի քան 150 մարդու մահվան պատճառ:
Մահացածների մեծ մասը անչափահասներ և 20-ն անց երիտասարդներ են: Հրշեջները զոհերի մեծ թիվը բացատրում են «բազմաթիվ մարդկանց ոտնահարվելու» փաստով։
Հարավային Կորեայի նախագահ Յուն Սեոկ Յոլը երկրում համազգային սուգ է հայտարարել։
