2023թ. պետական բյուջեից նախատեսվում է Ոստիկանությանը հատկացնել 76.2 միլիարդ դրամ:
Բյուջեի մասին օրենքի նախագծի քննարկման ժամանակ ՀՀ Ոստիկանության պետի տեղակալ Արա Ֆիդանյանը նշեց.
«2022 թվականին Ոստիկանությանը հատկացվել էր 66.6 միլիարդ դրամ: Այսինքն՝ տարբերությունը կազմում է 9.6 միլիարդ դրամ կամ 14.4 տոկոս»:
Ֆիդանյանը նաև նշել է, որ ներքին գործերի նախարարության ձևավորման օրենսդրական փաթեթի նախագիծը գտնվում է վերջնական ամբողջացման փուլում: Ըստ նրա՝ նոր նախարարության կառուցվածքի հիմքում ընկած են լինելու ոստիկանությունը, փրկարար և միգրացիոն ծառայությունները.
«ՆԳՆ-ի ձևավորումից հետո իրականացվելու են ոստիկանության կառուցվածքի և գործառույթների արմատական փոփոխություններ: Նախատեսվում է ոստիկանության զորքերի, պետական պահպանության գլխավոր վարչության և ճանապարհային ոստիկանության ուղեկցող ստորաբաժանման հենքի վրա ձևավորել ոստիկանության գվարդիա»։
