ՀՀ-ում ՌԴ դեսպան Սերգեյ Կոպիրկինը լրագրողների հետ ճեպազրույցում հայտարարել է, թե ՌԴ-ն չի դադարեցնում Հարավային Կովկասում խնդիրների կարգավորման համար ջանքերը։
Անդրադառնալով Սոչիի եռակողմ հանդիպմանը, դեսպան Կոպիրկինը շեշտել է, որ հանդիպման տևողությունն արդեն խոսում է այն մասին, որ տեղի է ունեցել բավական առարկայական ու բովանդակային հարցերի քննարկում.
«Շատ կարևոր է Սոչիում կայացած հանդիպման փաստը։ Թե որքան է դա տևել, ինչպես են նախապատրաստվել դրան՝ վկայում են այն մասին, որ կարգավորման բոլոր, ամենաբարդ հարցերի շատ առարկայական բովանդակային քննարկում, իրոք, տեղի է ունեցել»։
Կոպիրկինը հիշեցրել է նաև ՌԴ նախագահ Վլադիմիր Պուտինի հայտարարությունները.
«Ինչպես ասել է մեր նախագահը, ոչ բոլոր հարցերի շուրջ է հաջողվել պայմանավորվել, սակայն կարևոր է այն փաստը, որ քննարկումը տեղի է ունեցել և կողմերը պատրաստակամություն են հայտնել առաջ շարժվել կարգավորման ճանապարհով»։
Ըստ նրա, Ռուսաստանի համար առաջնահերթ է Հայաստանի և Ադրբեջանի միջև հարաբերությունների համակողմանի կարգավորումը։
