Իրանի ճանապարհների և քաղաքաշինության նախարարը հայտարարել է Իրանից Հայաստան ինժեներատեխնիկական ծառայությունների արտահանման մասին և ընդգծել իրանական ընկերությունների լիակատար պատրաստակամությունը՝ զարգացնել փոխադրումները երկու երկրների միջև և ստեղծել նոր տարանցիկ միջանցք Հայաստանի ու Պարսից ծոցի միջև։
Ըստ ԻՍՆԱ-ի՝ Ռոստամ Ղասեմին հանդիպել է ՀՀ տարածքային կառավարման և ենթակառուցվածքների նախարար Գնել Սանոսյանի հետ՝ քննարկելու երկու երկրների միջև համագործակցության զարգացման հեռանկարները։ Այս հանդիպմանը որոշվել է, որ իրանական ընկերությունները թունելների, ճանապարհների ու շենքերի կառուցման գործում կհամագործակցեն Հայաստանի հետ։
Երկու երկրները համաձայնվել են նաև ավարտին հասցնել և զարգացնել Հյուսիս-հարավ միջանցքը՝ Նորդոզի սահմանից մինչև Վարզգան և Թավրիզ: Երկու երկրները պայմանավորվել են Հայաստանի տարածքում Քաջարանի՝ 7,2 կմ երկարությամբ թունելի շինարարությունը իրանական ընկերությունների կողմից սկսել 2023 թվականի գարնանը։
Հաշվի առնելով, որ Հայաստանում կան բազմաթիվ շինարարական նախագծեր, որոնք ներառում են ճանապարհներ, թունելներ և բնակարանաշինություն, որոշվել է, որ Իրանից մի խումբ պրոֆեսիոնալ շինարարներ կայցելեն Հայաստան։
Ղասեմին նաև հավելել է, որ հետաքրքրված են դեպի Հայաստան ինժեներատեխնիկական ծառայությունների արտահանմամբ և նշել, որ Իրանը ցեմենտի չորրորդ խոշոր արտադրողն է աշխարհում, ինչպես նաև հաջողություններ է գրանցել պողպատի արտադրության մեջ։
