Եկամտային հարկի վերադարձի ծավալները տարեցտարի ավելանում են

ԱԺ մշտական հանձնաժողովների համատեղ նիստում ՊԵԿ նախագահ Ռուստամ Բադասյանն անդրադարձել է եկամտային հարկի վերադարձի ծավալներին՝ ընդգծելով, որ դրանք տարեցտարի ավելանում են։

Ըստ Բադասյանի, այս տարի վերադարձվել է 30.8 միլիարդ դրամ եկամտային հարկ, մեծ մասը՝ հիփոթեքային ծրագրի շրջանակում.

«ԱԱՀ-ի մասով վերադարձը 2021 թվականի հունվար-սեպտեմբերր ամիսներին կազմել է 108.9 միլիարդ դրամ, 2022 թվականի նույն ամիսներին՝ 139.8 միլիարդ դրամ:

2021 թվականի առաջին 9 ամիսներին 18.1 միլիարդ դրամ է եղել եկամտային հարկի վերադարձը, 2022-ի առաջին 9 ամիսներին՝ 30.8 միլիարդ դրամ, այսինքն` տարեցտարի շատ ավելի եկամտային հարկ ենք վերադարձնում:

ԱԱՀ-ի մասով, պարզ է, անընդհատ վերադառնում է տնտեսական շրջանառություն, բայց եկամտային հարկի հատվածի վրա ևս ուշադրություն եմ հրավիրում:

Իմ նշած 30.8 միլիարդ դրամի մեջ 25.8 միլիարդը հիփոթեքային ծրագիրն է»:

Բադասյանը նշել է, որ թեև հետագա տարիների համար սահմանափակվել է շահառուների շրջանակը, սակայն դեռ աճի միտում կա։ Բադասյանը պարզաբանել է, որ պատճառը  շինարարական թույլտվություններն են, որոնք ուժի մեջ են։