Բագրատաշենի անցակետի վերանորոգումից հետո հայ-վրացական սահմանով անցումը զգալիորեն կպարզեցվի։ Նոյեմբերի 1-ին Ազգային ժողովում՝ մշտական խորհրդարանական հանձնաժողովների համատեղ նիստում, 2023 թվականի պետական բյուջեի նախագծի քննարկման ժամանակ այս մասին ասաց Պետական եկամուտների կոմիտեի նախագահ Ռուստամ Բադասյանը։
Հաջորդ տարի, ինչպես նշեց ՊԵԿ ղեկավարը, կսկսվի անցակետի վերանորոգումը։ Այդ բոլորից բացի, այդտեղ կսահմանազատեն ֆիզիկական անձանց եւ բիզնեսի համար ստուգման եւ անցման հատվածները։ Ընդ որում երկու ուղղություններով։
«Այսպիսով, մեքենաներով եւ ավտոբուսներով երթեւեկող քաղաքացիները ստիպված չեն լինի հերթում սպասել՝ կանգնելով բեռնատարների հետեւում։ Բագրատաշենի անցակետի, ինչպես նաեւ Մեղրիի անցակետի վերանորոգումը կիրականացվի ԵՄ-ի հետ համագործակցությամբ»,- ասաց Բադասյանը։
Բացի այդ, բիզնեսի համար կներդրվի ապրանքների նախնական հայտարարագրման պրակտիկա՝ հանրապետության տարածքում գտնվող մաքսային պահեստից դուրս գալու ժամանակ։ Դրա շնորհիվ, ինչպես նշեց կոմիտեի ղեկավարը, մաքսային ստուգումը զգալիորեն կպարզեցվի։ «Այսպիսով, բիզնեսի համար սահմանով անցնելու ժամանակը զգալիորեն կկրճատվի»,- վստահեցրեց ՊԵԿ նախագահը։
