Ես անձամբ խոստացել էի, որ հեղափոխությունից հետո մեկ-երկու տարվա ընթացքում բյուջեի եկամուտները կավելացնենք 35-40 տոկոսով, իհարկե, այս խոստումը լիարժեք կատարվել է: Այս մասին, այսօր՝ նոյեմբերի 2-ին, ԱԺ հանձնաժողովներում 2023 թվականի բյուջեի քննարկումների ժամանակ հայտարարեց ՀՀ վարչապետ Նիկոլ Փաշինյանը:
Վարչապետի խոսքով՝ 2022 թվականի արդյունքներով սպասում են, որ բյուջեի հարկային եկամուտը 662 միլիարդ դրամով կամ 1,6 մլրդ դոլարով կգերազանցի 2018 թվականի ցուցանիշը. «Սա 52,6 տոկոսով կգերազանցի 2018-ի ցուցանիշը: Այսինքն մենք արդեն 2022-ին 52 տոկոսով բյուջեի եկամուտներն ավելացրել ենք 2018-ի համեմատ: 2023 թվականի համար հարկային եկամուտները պլանավորված են 2 տրիլիոն 203,7 միլիարդ դրամ, որը 2018 թվականի պետբյուջեի հարկային եկամուտներից ավելի է 946 միլիարդով կամ 75,1 տոկոսով: Այսինքն՝ հեղափոխությունից չորս տարի հետո մենք բյուջեի եկամուտներն ավելացնելու ենք 75 տոկոսով», – հայտարարեց վարչապետը:
Նա հավելեց, որ ակնկալում են, որ այս տարվա բյուջեն կգերակատարվի մոտավորապես 80 մլրդ դրամով, նախատեսվածի համեմատ:
