Վարչապետն առիթը բաց չի թողնում հաղորդակցվելու հասարակության հետ: Այս մասին, այսօր՝ նոյեմբերի 2-ին, ԱԺ-ում լրագրողների հետ զրույցում նշեց վարչապետի աշխատակազմի ղեկավար Արայիկ Հարությունյանը՝ անդրադառնալով հարցին, թե ինչու է ՀՀ կառավարությունը ձգտում ոչ ժողովրդավար լինել ու չշփվել լրագրողների հետ։
«Ապագայում էլ, ներկայում էլ, անցյալում էլ լրատվամիջոցները որևէ սահմանափակում չեն ունեցել թե շփվելու ղեկավարության հետ, թե գրություններով իրենց պատասխանները ստանալու», – ասաց նա՝ ընդգծելով, թե դրա լավագույն ապացույցն այն ինդեքսներն են, որոնք վերաբերում են մամուլի ազատությանը Հայաստանում:
Դիտարկմանը, թե թե ԱԺ-ում, թե այլ վայրերում լրագրողների տեղաշարժը սահմանափակվում է, Արայիկ Հարությունյանն ասաց. «Այդտեղ լրատվամիջոցները պետք է իրենց հարց տան, թե ինչու է այդ ռեգրեսը տեղի ունեցել, մի քիչ էլ այլ տեղերում փնտրեն պատասխանները: Բայց ցանկացած ժամանակ ցանկացած հարց կարող եք տալ, չեմ կարծում, որ ամեն օր շփումը արդյունավետ է նաեւ նախարարների համար»:
Նա խոստացավ եւս մեկ անգամ անդրադառնալ նախարարների, փոխնախարարների ասուլիսներին. «Կարծում եմ՝ ապագայում շատ առիթներ կունենաք»:
