Պետական վերահսկողական ծառայության ղեկավար Ռոմանոս Պետրոսյանն անդրադարձել է Երևանի քաղաքապետարանում իրականացված ստուգումներին։ Նրա խոսքով, ստուգումների արդյունքում 14 քրեական վարույթ է հարուցվել, որը վերաբերում է 2011-2022թթ. ժամանակահատվածին։
Նրա խոսքով. «Երևանի քաղաքապետարանում ուսումնասիրությունը մեկնարկել էր տարեսկզբին և վերջացել է, ամփոփվել, ու տեղեկանքները ներկայացվել են վարչապետին մայիսի 31-ին, որից հետո որոշ փաստերի համադրմամբ տեղեկատվությունը փոխանցվել է գլխավոր դատախազությանը, բայց զուգահեռաբար իրականացվում են մշտադիտարկումներ մի քանի ոլորտներում:
Կարող եմ ասել, որ այս պահի դրությամբ Երևանի քաղաքապետարանում իրականացված ուսումնասիրության և մշտադիտարկումների արդյունքով նախաձեռնվել են 14 քրեական վարույթներ»:
Ըստ ՊՎԾ ղեկավարի՝ խոսքը հիմնականում պետական բյուջեից դոտացիաների տրամադրման, դրանց ելակետային տվյալների, գույքահարկի, հողի հարկի, սեփական եկամուտների մասով սխալ հաշվարկների, ինչպես նաև մի շարք սուբյեկտների դեպքում սեփական եկամուտների գծով այդ միջոցների չգանձման փաստերի մասին է։
«Ինչպես նաև քաղաքաշինության ոլորտում առկա առերևույթ խախտումների, ինչպիսիք են՝ առանց տեղական տուրքի ու վճարների և վարչարարության կիրառման ժամկետանց շինթույլտվությունների մի քանի անգամ երկարաձգումները, ավարտական ակտերի մասով առանց վարչարարության և առանց վճարների գանձման տրամադրումները ու խտրական մոտեցումները: Բոլոր այդ փաստերին իրավական գնահատական կտրվի»,- ընդգծել է նա։
