ՀՀ էկոնոմիկայի նախարար Վահան Քերոբյանն ԱԺ-ում անդրադարձել է օտարերկրյա ներդրումների ծավալներին։ Ըստ նրա՝ 2021 թվականին Հայաստանի տնտեսական իրական հատվածում օտարերկրյա ներդրումների զուտ հոսքերի ծավալները կազմել են 204,8 միլիարդ դրամ, որից ԵԱՏՄ երկրների կողմից օտարերկրյա ներրդումների զուտ հոսքերի ծավալը կազմել է 32,4 միլիարդ դրամ։
Քերոբյանը մանրամասնել է, որ նույն ժամանակահատվածում օտարերկրյա ուղղակի ներդրումները կազմել են 129,2 միլիարդ դրամ, որից ԵԱՏՄ երկրներին բաժին է ընկել 40,1 միլիարդ դրամ. «2022 թվականի առաջին կիսամյակում Հայաստանի տնտեսության մեջ օտարերկրյա ներդրումների զուտ հոսքերի ծավալը կազմել է 41 միլիարդ դրամ, որից ԵԱՏՄ երկրների կողմից օտարերկրյա ներդրումների զուտ հոսքերի ծավալը կազմել է շուրջ 47 միլիարդ դրամ»։
Նույն ժամանակահատվածում օտարերկրյա ուղղակի ներդրումների ծավալը կազմել է 76,5 միլիարդ դրամ, որից ԵԱՏՄ երկրներին բաժին է ընկել 57,5 միլիարդ դրամը:
Վահան Քերոբյանը խոսեց նաև Եվրասիական զարգացման բանկի հետ Հայաստանի հարաբերությունների մասին, ասաց՝ այս տարի բանկը մի քանի բավական խոշոր գործարքներ է կնքել Հայաստանում. «Երեք գործարք է, ընդհանուր ծավալը մոտ 100 միլիոն դոլար է, որի մեջ կա մեկ խոշոր գյուղատնտեսական նախագիծ «Yeremyan projects»-ի հետ, վերականգնող էներգետիկայի խոշոր նախագիծ կա «Optimum eneregy»-ի հետ և «Տաշիր գրուպ»-ի հետ նախագիծ կա՝ արդյունաբերական ընկերությանը ֆինանսավորում հատկացնելու առումով»։
