ԲՀԿ առաջնորդ, գործարար Գագիկ Ծառուկյանի «Մուլտի տաբակ» ընկերությունը կառավարությունից 16,5 միլիարդ դրամի մաքսային արտոնություն կստանա։ Համապատասխան որոշումն ընդունվել է կառավարության այսօրվա նիստում։
«Մուլտի տաբակ» սահմանափակ պատասխանատվությամբ ընկերության կողմից ներմուծվող հումքը նախատեսվում է օգտագործել ծխախոտի արտադրության համար։ Արտադրությունն իրականացվելու է ՀՀ Կոտայքի մարզում։
«Մուլտի տաբակ» ընկերությունը հիմնադրվել է 2019 թվականին։ Ծրագրի շրջանակներում նախատեսվում է իրականացնել 59 մլրդ դրամի ներդրում՝ հիմնական և շրջանառու միջոցների ձեռքբերման համար։ Արտադրանքի 80 տոկոսը և ավելին նախատեսվում է արտահանել։
Կառավարության հիմնավորման համաձայն՝ ստեղծվելու է 100 նոր աշխատատեղ։
