ՀՀ ԱԺ–ում բյուջետային քննարկումների ժամանակ ՔՊ խմբակցության պատգամավոր Խաչատուր Սուքիասյանը ԱԳՆ գլխավոր քարտուղար Բորիս Սահակյանին ասաց, որ ցանկալի կլինի, որ մեր դեսպանատները տեղեկացված լինեն Հայաստանում տնտեսական գործընթացներից, այդ թվում՝ արդյունաբերական, ծառայությունների մատուցման ոլորտից։
«Դեսպանատները պետք է իմանան ամեն ինչ այն գործողությունների մասին, որոնք բերում են տնտեսական ակտիվության, քանի որ նման դեպքում ավելի հեշտ է գտնել հասցեատիրոջը, քննարկել տվյալ երկրում այս կամ այն արտադրության համար ինչպես ՀՀ-ի հետ ստեղծել հարաբերությունների հարթակ»,- նշեց Սուքիասյանը՝ հետաքրքրվելով, թե ինչ է պետք անել, որ դա դառնա մեզ համար աշխատանքային։
«Օրինակ՝ տեղյակ են IT ոլորտից, եթե Եվրոպայում խոշոր կառույցներին ասվի՝ աշխարհի 20 կամ 30 թրենդները նեկայացված են ՀՀ-ում, այսքան մարդ է աշխատում, այսքան պրոդուկտ են տալիս, ապա այդ մարդիկ չեն կարող լուրջ չվերաբերվել մեր երկրին»,- շեշտեց Սուքիասյանը։
Սրան ի պատասխան՝ Սահակյանը նշեց, որ տարիներ շարունակ աշխատանքներ են տարվել այս ուղղությամբ, սակայն նյութերի պակաս միշտ էլ եղել է։ Նա նշեց, որ այժմ գործընթացն ավելի է ակտիվացել։
