ԱՄՆ-ը ժամում մոտ 2,5 մլն դոլար է հատկացնում Ուկրաինային։ Այսպիսի հաշվարկ է կատարել ամերիկացի պաշտոնաթող գեներալ-լեյտենանտ և Դոնալդ Թրամփի ազգային անվտանգության գծով նախկին խորհրդական Ջոզեֆ Քիթ Քելլոգը Fox News-ին տված հարցազրույցում:
Նա հիշեցրել է, որ Միացյալ Նահանգները տրամադրել է 18 միլիարդ դոլարի տնտեսական, հումանիտար և ռազմական օգնություն։
«Սա ամերիկյան հարկատուների փողերն են։ Եվ կրկին՝ առանց որևէ հաշվետվության»,- ընդգծել է Քելլոգը։
Թրամփի նախկին խորհրդականը նաև վկայակոչել է Կիլի Համաշխարհային տնտեսության ինստիտուտի տվյալները, ըստ որոնց՝ ԱՄՆ-ն Ուկրաինային երկու անգամ ավելի շատ գումար է տալիս, քան բոլոր եվրոպական երկրները միասին վերցրած:
«Ամերիկացիներին պետք է բացատրել, թե ինչու ենք մենք դա անում, ինչու ենք մենք Ուկրաինայում, արդյո՞ք պետք է այնտեղ լինենք և որն է իրադարձությունների ցանկալի արդյունքը»,- եզրափակել է նա։
Ավելի վաղ ԱՄՆ-ը հայտարարել էր Ուկրաինային 400 մլն դոլարի ռազմական օգնություն հատկացնելու մասին։ Նշվում է, որ օգնության նոր փաթեթը կներառի 250 M1117 զրահափոխադրիչներ, 40 զրահապատ նավակներ, ինչպես նաև 1,1 հազար Phoenix Ghost անօդաչու թռչող սարքեր և Hawk հակաօդային պաշտպանության համակարգեր։ Կիևը կստանա նաև 45 խորհրդային T-72 տանկ, որոնք արդիականացվել են ԱՄՆ-ի կողմից Նիդեռլանդների և Չեխիայի հետ միասին։
