Իրանն առաջին անգամ հաստատել է, որ անօդաչու սարքեր է հանձնել Ռուսաստանին։ Համապատասխան հայտարարությունն, ըստ Reuters-ի, արել է արտգործնախարար Հոսեյն Աբդոլլահյանը։
Աբդոլլահյանի խոսքով՝ Թեհրանը Մոսկվային մատակարարել է միայն «փոքր» անօդաչու սարքեր։ Միաժամանակ, առաքումները կատարվել են Ուկրաինա ռուսական ներխուժումից մի քանի ամիս առաջ, պնդում է նախարարը։
Աբդոլլահյանը նաև ընդգծել է, որ Իրանն իրեն չի համարում ուկրաինական հակամարտության կողմ, և եթե Թեհրանին ներկայացվեն պատերազմում անօդաչու թռչող սարքերի կիրառման ապացույցներ, ապա երկիրը «անտարբեր չի մնա»։ Նա նշել է, որ Իրանն ու Ուկրաինան պայմանավորվածություններ ունեն նման ապացույցներ ներկայացնելու վերաբերյալ։
Ավելի վաղ Իրանի իշխանությունները բազմիցս հերքել են, որ անօդաչու սարքեր են մատակարարել Ռուսաստանի Դաշնությանը։ Ընդ որում, Ուկրաինայի զինված ուժերը գրեթե ամեն օր հայտնում են իրանական արտադրության անօդաչու թռչող սարքերի ոչնչացման մասին։
Աղբյուրը՝ Meduza.io
