ԱԺ-ում լրագրողների հետ ճեպազրույցում Երևանի քաղաքապետ Հրաչյա Սարգսյանը հայտնեց, որ մետրոյի «Աջափնյակ» նոր կայարանի նախագծման աշխատանքները ընթացքի մեջ են։
«Առաջին փուլը արդեն ընթացքում է, հանձնման-ընդունման ընթացքն է տեղի ունենում։ Վերջնական նախագծման փուլը պատրաստ կլինի հաջորդ տարի հունիս-հուլիս ամիսներին, որից հետո, երբ որ նախագծանախահաշիվային փաստաթղթերը լինի, ծավալը լինի, արդեն պետք է մրցույթ հայտարարվի մետրոյի կայարանի կառուցման համար».- նշեց քաղաքապետը։
Հարցին, թե հնարավոր է, որ սկսեն կառուցել հենց 2023թ.-ից, քաղաքապետը նշեց, որ չի կարծում, որ դա 2023թ. տեղի կունենա։
«Նորմալ պրոցես է դա։ Նախագիծը կլինի, կարծում եմ՝ դրանից հետո մրցույթ կհայտարարվի։ Հետո արդեն պետք է հասկանանք, թե ինչ ֆինանսական միջոցների հաշվին է մետրոպոլիտենի կառուցումը լինելու»։
Քաղաքապետը նշեց, որ հավանական է, որ ֆինանսավորումը կիրականցվի միջազգային կազմակերպությունների միջոցով, քանի որ էներգախնայողության կոմպոնենտներ կա ծրագրի մեջ, ինչպես նաև կներգրավվեն դրամաշնորհներ։
