ՀՀ տարածքային կառավարման և ենթակառուցվածքների նախարար Գնել Սանոսյանն անդրադարձել է Հյուսիս-հարավ ճանապարհային միջանցքի Սյունիքի հատվածի կառուցման աշխատանքներին։
Նրա խոսքով, այդ ճանապարհը պետք է բաժանել 3 մասի՝ Սիսիանից դեպի Քաջարան, առանձին Քաջարանի թունել և Սիսիանից դեպի Ագարակ. «Իրանական կողմի ֆինանսավորման մասին քննարկել ենք միայն Քաջարանի թունելի մասով: Այսինքն՝ մյուս երկու կտորների մասով մենք ունենք գործընկերներ, որոնց հետ այդ քննարկումների փուլն անցել ենք, հստակ են ֆինանսավորման աղբյուրները, երկուսի պարագայում էլ ունենք մրցութային գործընթաց:
Սիսիան-Քաջարանը բավական վաղ ենք սկսել, մրցույթի առաջին փուլը գրեթե ամփոփեցինք, հիմա անցնում ենք երկրորդ փուլին, այն է՝ այն շինարարական ընկերությունները, որոնք առաջին փուլը հաղթահարել են, նրանց արդեն կտրվի համապատասխան փաստաթղթերը, որպեսզի գնային առաջարկ անեն»։
Սանոսյանը հավելել է, որ այդ գործընթացը սպասվածից մի փոքր երկար է տևում: Նա նշել է, թե Քաջարանի թունելի մասով ցանկություն ունեն իրանական գործընկերների հետ աշխատել.
«Եթե հնարավոր է՝ կամ իրանական վարկով իրանական ընկերություն աշխատի, կամ նույնիսկ չի բացառվում, որ այդ բյուջեի միջոցներով կարող ենք մեր և իրանական կողմի համար հարմար տարբերակով տալ իրանական ընկերություններին: Կարծում ենք՝ իրանական ընկերությունները նախ՝ կարողություններ ունեն, որոնք անձամբ տեսել եմ, երբ այցելել եմ Իրան, տեսել եմ՝ ինչ թունելներ, կամուրջներ են ի վիճակի կառուցել, նաև կարծում ենք, որ իրանական ընկերությունները կարող են ֆինանսական տեսանկյունից լավ առաջարկներ ներկայացնել»։
