Օկուպացված Շուշիում Ալիևի հայտարարությունը հերթական անգամ լցված էր Հայաստանի և Արցախի դեմ ուժի կիրառման խոստովանություններով և սպառնալիքներով։
Այս մասին իր «Տելեգրամ ալիքում»-ում գրել է Արցախի Հանրապետության պետնախարարի խորհրդական Արտակ Բեգլարյանը՝ անդրադառնալով Ալիևի հնչեցրած սպառնալիքներին։
«Ալիևյան ռեժիմը շարունակում է ցեղասպանության և ատելության քաղաքականությունը հայ ժողովրդի և հայոց պետականության նկատմամբ։
Պետք է դադարեցնել այս քաղաքականությունը և կանխել նոր հանցագործությունները միջազգային իրավունքի և պարտավորությունների շրջաններում»,- նշել է Բեգլարյանը։
Ինչպես ավելի վաղ հայտնել էինք, երեկ՝ նոյեմբերի 8-ին, Ադրբեջանի նախագահ Ալիևը մեկնել էր Շուշի՝ «հաղթանակ»-ի 2 տարին տոնելու։ Դահլիճում հավաքված զինվորականների առջև իր ունեցած ելույթում Ալիևը հիմնականում գովում էր ինքն իրեն և սպառնում Հայաստանին:
Բնականաբար, առիթը բաց չթողնելով՝ Ալիևը միջանցքի վերաբերյալ կրկին կեղծ պահանջներ ներկայացրեց Հայաստանին։ Նա չմոռացավ նաև սպառնալ հարևան Իրանին՝ նրա անցկացրած «զորավարժություններին համարժեք պատասխան տալու խոստումով»:
