Երևանում հանդիսավորությամբ տրվեց «Մանկական Եվրատեսիլ 2022» երգի միջազգային մրցույթի հետհաշվարկը

Այսօր Երևանում հանդիսավորությամբ տրվեց «Մանկական Եվրատեսիլ 2022» երգի միջազգային մրցույթի հետհաշվարկը. մնաց 30 օր։ Հետհաշվարկը ազդարարեցին Եվրատեսիլը Հայաստան բերած Մալենան և այս տարվա Հայաստանի ներկայացուցիչ Նարե Ղազարյանը։

Երևանի փոխքաղաքապետ Տիգրան Ավինյանը շնորհակալություն հայտնեց Մալենային համաեվրոպական այս մրցույթը Հայաստան բերելու համար. «24 օր հետո մենք բոլորս ականատես կլինենք Երևանում այս տարի կայացող ամենամասշտաբային միջոցառումներից մեկին՝ «Մանկական Եվրատեսիլ»-ին»։

Ավինյանը նաև շեշտել է. «Քաղաքապետարանը հատուկ տոնական նախապատրաստություններ է տեսնում և՛ «Մանկական Եվրատեսիլի» և Նոր տարվա կապակցությամբ։ Եւ մենք դեռ որոշակի անակնկալներ ունենք մայրաքաղաքի համար»։ 

Հանրային Հեռուստաընկերության գործադիր տնօրեն Հովհաննես Մովսիսյանը նշել է, որ այս ընթացքում մեծ աշխատանք է կատարվել, որպեսզի բոլորը մասնակից դառնան տոնին։

Միջոցառմանը ներկա էին ՀՀ վարչապետի աշխատակազմի ղեկավար Արայիկ Հարությունյանը, մասնակից երկրների դիվանագիտական ներկայացուցիչները, մրցույթի գործընկերներն ու Եվրատեսիլի երկրպագուները:

Դեկտեմբերի 5-ին Հանրապետության հրապարակում մրցույթի մասնակիցները կվառեն մայրաքաղաքի գլխավոր տոնածառի լույսերը: Տարվա ամենասպասված իրադարձությունը տեղի կունենա դեկտեմբերի 11-ին, ժամը 19:00-ին, Կարեն Դեմիրճյանի անվան մարզահամերգային համալիրում: