Փաշինյանի խոսքով՝ Սոչիի փաստաթուղթը Հայաստանի համար ընդունելի է

ՀՀ վարչապետ Նիկոլ Փաշինյանը Սոչիում ՌԴ նախագահի հետ և՛ հրապարակային, և՛ ոչ հրապարակային հանդիպումներում ասել է, որ Հայաստանը պաշտպանում է ՌԴ դիրքորոշումը:

Փաշինյանն այս մասին ասել է «Հանրային հեռուստաընկերությանը» տված հարցազրույցում:

«Ի վերջո, Սոչիում աշխատանքի արդյունքում ստացվել է մի փաստաթուղթ, որի հետ բոլորը համաձայն են»,-ասաց նա:

Վարչապետի խոսքով՝ սեղանին դրվել է մի փաստաթուղթ, որի ներքո Հայաստանը համաձայնել է ստորագրել, և համարում է օգտակար: Հարցին՝ դեռ շրջանառության մե՞ջ է արդյոք ռուսական առաջարկը, Փաշինյանն պատասխանեց՝ հարցի պատասխանը պետք է Ռուսաստանը հնչեցնի:

«Մենք ասել ենք՝ այդ տարբերակը մեզ համար ընդունելի է: Այդ թեման հրապարակային է դարձել ՌԴ նախագահի «Վալդայ» ակումբում արած հայտարարությունից հետո: Ուստի ձեր հարցը վերահասցեագրում եմ ՌԴ-ին, թող իրենք հրապարակային պատասխանեն»,-ասաց Փաշինյանը:

Նիկոլ Փաշինյանը նաև վերահաստատեց՝ Հայաստանը շարունակում է խաղաղության պայմանագրի ջատագով լինել, սակայն անհրաժեշտ են երաշխիքներ, որ պարտավորություններ ստանձնելու դեպքում Ադրբեջանը կկատարի դրանք:

Փաշինյանի խոսքով՝ էական չէ այդ դերը կստանձնի ՌԴ-ն, ՄԱԿ-ը, թե այլ «միջազգային կարևոր խաղացող», Հայաստանը ուրախ կլինի և պատրաստ պայմանագիրը ստորագրել: