Հնարավորինս քիչ Ռուսաստան մեր գործերում, հնարավորինս հեռու ՌԴ-ից․ Ռ․ Մեհրաբյան

Թիվ 1 ստուդիան հյուրընկալել է «Հանուն Հանրապետության» կուսակցության փոխնախագահ Ռուբեն Մեհրաբյանին։

Պարոն Մեհրաբյանը նշեց՝ հնարավորինս քիչ Ռուսաստան մեր գործերում, հնարավորինս հեռու Ռուսաստանից:

Նա հավելեց, որ սա շատ հստակ քաղաքական ազդակ էր Փարիզից` ֆրանսիական և´ պետությունից, և´ հասարակությունից, ազդակ` պատրաստակամության մասին։ Ֆրանսիան գործոն է, որի հետ հաշվի են նստում և նստելու թե՛ միջազգային կազմակերպություններում, և թե՛ տարածաշրջանի դերակատարները:

Տեղի է ունենում Ռուսաստանի հիմնահատակ ջախջախում, Ռուսաստանը ենթարկվում է պատմականորեն աննախադեպ միջազգային բոյկոտի, և ռուսական ներուժը պարզապես լիկվիդացվում է:

Այսօր Ռուսաստանը մի պետություն է, որը չի ճանաչում մեր անկախությունը, ինքնիշխանությունը, սահմանները, ինչպես նաև չի ճանաչում մեր իրավունքը` խաղաղության մեջ ապրելու մեր հարևանների հետ. եթե սրանք թշնամական գործողություններ չեն, ապա ի՞նչ է թշնամական գործողություն ասվածը ընդհանրապես և սկզբունքով,- եզրափակեց նա։