Բաքուն Երևանից փոխհատուցում է պահանջում «ադրբեջանցիների իրավունքների կոպիտ խախտումների» հետևանքով առաջացած վնասների համար, հայտարարել է Ադրբեջանի արտգործնախարարությունը՝ մեկնաբանելով Հայաստանի դեմ Մարդու իրավունքների եվրոպական դատարան Բաքվի ներկայացրած նոր հայցը:
Ըստ դիվանագիտական գերատեսչության՝ Ադրբեջանը ապացույցներ է ներկայացրել 2022 թվականի մայիս-օգոստոսին Լաչին քաղաքից և հարակից երկու գյուղերից հայկական Զինված ուժերի դուրսբերման ժամանակ գույքի, այդ թվում՝ հարյուրավոր քաղաքացիների տների և այլ բնակելի տարածքների դիտավորյալ և նպատակաուղղված ոչնչացման մասին։
Ադրբեջանի ԱԳՆ-ի համաձայն՝ հայցադիմումում նշվել է, որ «չնայած այդ տարածքներում արդյունավետ վերահսկողության իրականացմանը, Հայաստանի կառավարությունը որևէ քայլ չի ձեռնարկել լայնածավալ ավերածությունները կանխելու համար»։
