Դեկտեմբերի 27-ին Թուրքիայի հատուկ ներկայացուցիչ, դեսպան Սերդար Քըլըչը ելույթ է ունեցել Անկարայի համալսարանի լեզվաբանական և պատմաաշխարհագրական ֆակուլտետի կազմակերպած համաժողովում։ Քըլըչը խոսել է Հայաստան-Թուրքիա գործընթացի մեկնարկի, ներկա փուլի և ապագայի տեսլականների մասին։
Նա անդրադարձել է նաև Հայաստանի և Ադրբեջանի միջև ընթացող խաղաղության բանակցություններին։ Քըլըչը, մասնավորապես, հայտարարել է, որ Վիեննայում իր և Ռ․ Ռուբինյանի վերջին հանդիպման ժամանակ որոշվել է դյուրացնել սահմանի ցամաքային անցումը երրորդ երկրների քաղաքացիների համար, որոնք ցանկանում են այցելել երկու երկրներ։ Քըլըչը նաև հայտարարել է, որ նոյեմբերի 1-ին, այս որոշման համաձայն, հանդիպում է կայացել Թուրքիայի և Հայաստանի տեխնիկական պատվիրակությունների միջև։
«Տեխնիկական թիմերի հանդիպումը տեղի է ունեցել առավոտյան՝ թուրքական, իսկ ցերեկը՝ հայկական կողմից։ Դա, իհարկե, խորհրդանշական նշանակություն ունի։ Ինչ վերաբերում է առևտրային ավիահաղորդակցության բացմանը կան տեխնիկական մանրամասներին, ինչպիսիք են շտրիխ կոդավորման համակարգը, դրանք համաձայնեցվել են տեխնիկական պատվիրակությունների միջև։ Բայց ինչ վերաբերում է ավտոմոբիլային անցումներին, գուցե անհրաժեշտ լինի մի փոքր սպասել, քանի որ Ալիջան անցակետի կամուրջը կարող է անհրաժեշտ լինի վերանորոգել, քանի որ այն 1944թ. չի վերանորոգվել»։
Քըլըչը նաև անդրադարձել է ապագայի քայլերին և հայ-թուրքական ու հայ-ադրբեջանական հարաբերություններին․ «Քայլեր կան, որ մենք պետք է ձեռնարկենք։ Քայլեր կան, որ ակնկալում ենք հայերից. կամ Հայաստանում, կամ Թուրքիայում ևս մեկ հանդիպում կանցկացնենք հատուկ ներկայացուցիչների միջև։
Պետք է գիտակցել, որ գործընթացներից մեկում դրական տեղաշարժը դրականորեն է ազդում մյուս գործընթացի վրա, և հակառակը, գործընթացներից մեկում բացասական զարգացումը ազդում է մյուսի վրա: Այս երկու գործընթացներն առանձին-առանձին են, բայց հնարավոր չէ լիովին տարանջատել իրարից։ Տարածաշրջանի երկրներն իրենց խնդիրներն իրենք պետք է լուծեն և տեր կանգնեն դրանց: Այս պահին մենք Ռուբինյանի հետ միասին հենց սա ենք փորձում անել»,- հավելել է Քըլըչը։
