Կորեայի ձորում շին․ աղբի խնդրի ահազանգն անտեսելու արդյունքում ջրատարը վթարվել է

Կորեայի ձորում տևական ժամանակ ապօրինաբար շինարարարական աղբ թափելու հետևանքով տեղի է ունեցել ջրատարի խոշոր վթար, որի հետևանքով Արաբկիր վարչական շրջանի մի շարք հասցեներ ջրազրկված են, իսկ «Վեոլիա Ջուր» ընկերությունը հնարավոր է դիմի իրավապահ մարմիններին։

Դեռևս ամիսներ առաջ Թիվ 1-ը ահազանգել էր Հրազդանի կիրճում՝ Կորեայի ձորում ահագնացող բնապահպանական աղետի մասին՝ հրավիրելով պատկան մարմինները ուշադրությունը՝ ակնկալելով քայլեր ձեռնարկել խնդրին լուծում տալու համար։

Մեր նկարահանող խումբը օրեր շարունակ դիտարկումներ անցկացնելուց հետո պարզել էր ապօրինության հեղինակներին, ներկայացրել շին․ աղբի հետևանքով հնարավոր ռիսկերը, և ավելին՝ չբավարարվելով խնդրի՝ մեդիա հրապարակմամբ՝ հետամուտ եղել պատկան մարմիններից հարցումների միջոցով խնդիրը հասցեավորելուն։ Բայց այս ամենը բախվեց անտարբերության պատին՝ Արաբկիրի թաղապետարանից մինչև բնապահպանության նախարարություն, Ոստիկանությունից մինչև դատախազություն։

Արդյունքում՝ արդեն այսօր Երևանի կարևոր ջրատարներից մեկը վթարված է, և մայրաքաղաքի մի հատվածը՝ ջրազրկված, իսկ պետությունը՝ ջրամատակարար (ֆրանսիական) ընկերությանը փոխհատուցման հավանական պարտավորության առաջ։