Հունվարի 15-ին՝ կիրակի օրը, Ֆրանսիայի Մարսել քաղաքում համերաշխության երթ է տեղի ունեցել՝ ի պաշտպանություն Արցախի, որին մասնակցել է 300 մարդ՝ ըստ «Նուվել դ’Աղմենի» պարբերականի։
Խաղաղ երթը մեկնարկել է Միսաք Մանուշյանի անվան հրապարակից և ավարտվել Պրադոյի հայկական տաճարի մոտ՝ անցնելով նաև Թուրքիայի հյուպատոսության մոտով։
Երթը գլխավորած Պասկալ Շամասյանը և Ժերար Գրիգորյանը, որոնք «Վազել՝ հանուն հիշողության» ասոցիացիայի հիմնադիրներն են, ամբողջ քայլերթի ընթացքում դատապարտել են Արցախի շրջափակումը Ադրբեջանի կողմից։
2022թ․ դեկտեմբերի 12-ից Ադրբեջանը փակել է Արցախը ՀՀ-ին կապող Լաչինի միջանցքը, ինչի հետևանքով շրջափակման մեջ է Արցախի 120 000 բնակիչ, այդ թվում՝ 30 000 երեխա։ 1100 քաղաքացիական անձ, այդ թվում՝ 270 անչափահաս, չի կարողանում ՀՀ-ից վերադառնալ Արցախ։
Շրջափակման պատճառով ՀՀ-ից ամեն օր 400 տոննա սննդամթերք ու դեղորայք հնարավոր չի լինում հասցնել Արցախ․ առկա է սննդի, դեղորայքի պակաս:
13 երեխա նորածնային և վերակենդանացման բաժանմունքներում է, 8 բուժառու՝ վերակենդանացման բաժանմունքում․ 3-ը ծայրահեղ ծանր վիճակում են։ Այս օրերի ընթացքում շտապ բուժօգնության կարիք ունեցող 28 հայ և 4 օտարերկրացի է միայն Կարմիր խաչի միջնորդությամբ տեղափոխվել ՀՀ, իսկ Արցախում հիվանդներից մեկը մահացել է:
Հունվարի 10-ից վթարի պատճառով Արցախում էլեկտրամատակարարումն իրականացվում է տեղական սահմանափակ ռեսուրսի միջոցով, ինտերնետ կապը վերականգնված է։
Արցախը շրջափակման մեջ է։
