Լաչինի միջանցքի արգելափակումը և Ադրբեջանի նախագահ Իլհամ Ալիևի հայտարարություններն ուղիղ խախտում են իր իսկ ստանձնած միջազգային պարտավորությունները, միջանցքի շրջափակումն ու այդ հայտարարությունները նոր խոչընդոտներ են ստեղծում խաղաղության գործընթացի համար, սակայն ո՞վ է ասում, թե դա չէ Ադրբեջանի հեռահար նպատակը, «Արմենպրես»-ի հաղորդմամբ՝ հայտարարել է ՀՀ վարչապետ Նիկոլ Փաշինյանը ԱԺ-կառավարություն հարցուպատասխանին՝ անդրադառնալով ՔՊ խմբակցության պատգամավոր Դավիթ Դանիելյանի հիշեցմանը, որ Ադրբեջանի նախագահը վերջին հարցազրույցում կրկին տարածքային պահանջներ է ներկայացրել ՀՀ նկատմամբ: Պատգամավորը հետարքրքվել է միջազգային կառույցների արձագանքով:
«Կարծում եմ, և նաև մեր միջազգային շփումները ցույց են տալիս, որ միջազգային հանրության ընկալումն այս իրավիճակի նկատմամբ ավելանում, մեծանում է: Եվ ես կարծում եմ, որ ընդհանրապես այդ հայտարարությունները որոշակի պրովոկացիոն բնույթ ունեն, էսկալացիա ստեղծելու նպատակ ունեն: Այդ հայտարարություններին մեր ճիշտ արձագանքն է, որ պետք է տարածաշրջանում կայունության որոշակի գործոն հանդիսանա: Մենք, ըստ էության, շատ հստակ ենք հայտարարում, որ Պրահայի պայմանավորվածությունների հիման վրա մենք պատրաստ ենք գնալ խաղաղության պայմանագրի ստորագրման»,- ասել է Փաշինյանը:
Վարչապետն ընդգծել է, որ Ադրբեջանի նախագահի հայտարարություններն առաջին հերթին հակասում են ձեռք բերված պայմանավորվածություններին:
Միջազգային հանրության ընկալում ասելով՝ վարչապետը նկատի ունի, որ մարդկանց ակնհայտ է դառնում, որ հենց Լաչինի միջանցքի շրջափակումը և Ալիևի այդ հայտարարություններն ուղիղ խախտում են Ադրբեջանի ստանձնած միջազգային պարտավորությունները:
Իսկ տարածաշրջանում իրավիճակը կայուն պահելու լավագույն տարբերակն է համարում բանակցային և քաղաքական ճանապարհով լուծումների գնալը: «Եվ, ինչպես մենք ստանձնել ենք մեր պատրաստակամությունն ու պատասխանատվությունը, նույնկերպ մենք պատրաստ ենք շարունակել: Ակնհայտ է և միջազգային հանրությունն էլ արձանագրում է, որ Լաչինի միջանցքի շրջափակումն ու Ադրբեջանի ագրեսիվ հայտարարությունները նոր խոչընդոտներ են ստեղծում խաղաղության գործընթացի համար: Բայց հարց. Իսկ ո՞վ է ասել, որ հենց դա չէ Ադրբեջանի ուզածը, իսկ ո՞վ է ասել, որ հենց դա չէ հեռահար նպատակը, որ հենց այդ կարգի սադրիչ հայտարարություններով և մեր հնարավոր ռեակցիաներն էլ օգտագործելով՝ ամբողջությամբ վիժեցնել խաղաղության գործընթացը»,-ասել է վարչապետը՝ կարևորելով հայկական կողմից վերաբերմունքի մեթոդը չփոխելը:
Վարչապետը հավելել է, որ հայկական կողմի արձագանքն այդ ամենին պետք է լինի ասիմետրիկ: Իսկ դա ակտիվ միջազգային դիվանագիտությունն ու երկրի ներսում ինստիտուցիոնալ կարողությունների, պետական ինստիտուտների ավելի հզորացումը, կայացումը, բարեփոխումների օրակարգից չշեղվելը, խաղաղության օրակարգից չշեղվելն է: Փաշինյանը կարծում է, որ հայկական կողմի արձագանքը դա պետք է լինի:
