Ուկրաինան Վրաստանի ղեկավարությանը չի խնդրել իրեն անվճար փոխանցել «Բուկ» զենիթահրթիռային համակարգերը և պատրաստակամություն է հայտնում ձեռք բերել դրանք։
Այս մասին հայտարարել է Վրաստանում Ուկրաինայի գործերի ժամանակավոր հավատարմատար Անդրեյ Կասյանովը։
Դիվանագետն անհասկանալի է համարել վրացի քաղաքական գործիչների, խորհրդարանի փոխխոսնակի հայտարարությունները, ինչպես նաև պաշտպանության նախարարության վերջին հայտարարությունները, թե Ուկրաինան խնդրել է անվճար փոխանցել «Բուկ» համակարգերը։
«Ուզում եմ ընդգծել, որ Ուկրաինան արդեն 30 պաշտոնական հարցում է ուղարկել Վրաստանի պաշտպանության նախարարությանը, վերջին հարցումն ուղարկվել է Ուկրաինայի դեսպանատան կողմից 2023 թվականի հունվարի 12-ին։ Այս խնդրանքները մնացին անպատասխան։ Դրանցում մենք նշում ենք զենքի և ռազմական տեխնիկայի փոխանցման կամ վաճառքի հնարավորությունը»,- ասել է Կասյանովը վրացական Palitra News հեռուստաալիքի եթերում։
20:25
Մայիս 4, 2026
