ՀՀ ԱԺ «Իմ քայլը» խմբակցության պատգամավոր Արուսյակ Ջուլհակյանը ֆեյսբուքյան իր էջում գրում է․
Անհամբեր սպասում էի, որ Ամուլսարի մասին արտահայտվի հանքը շահագործելու լիվենզիա տրամադրելու ժամանակ Վայոց Ձորի մարզպետ աշխատած, ներկայումս Սահմանադրական դատարանի աշխատակազմի ղեկավար Էդգար Ղազարյանը: Դեմ է, լուրջ խնդիրներ է տեսնում: Իր իրավունքն է, ընդունում եմ ի գիտություն: Պարզապես ակամայից հիշեցի որպես Վայոց Ձորի մարզպետ պարոն Ղազարյանի հարցազրույցները, որտեղ վերջինս Ամուլսարի ծրագիրը համարում էր մի հիանալի պրոյեկտ, մի խոսքով` մի հրաշալի անձնավորություն: Ստորև մեջ եմ բերում պարոն Ղազարյանի` 2014թ. կարծիքից հատվածներ:
«Որպես տնտեսական նախագիծ Ամուլսարի հանքավայրի շահագործումը շատ մեծ է՝ իր բոլոր տնտեսական հնարավոր արդյունքներով՝ թե´ աշխատատեղերի ստեղծման, թե´ հարկերի վճարման առումով: Դեռ նախագիծն ամբողջությամբ չի իրականացվում, բայց մեր մարզի մի շարք համայնքներ՝ Սարավանը և Գնդեվազը, արդեն ստանում են մեծ չափի հողի վարձակալական գումարներ: Այսինքն՝ տնտեսական առումով այդ հանքավայրի շահագործումը շատ ձեռնտու է»:
«Ուրախությամբ պետք է արձանագրել, որ հանքավայրը շահագործող “ԳԵՈԹԻՄ” ընկերությունը ցուցաբերում է կորպորատիվ սոցիալական պատասխանատու վարքագիծ, և լրջությամբ ու ըստ էության է վերաբերվում բոլոր այն խնդիրներին, որոնք կարող են առաջանալ հանքավայրը շահագործելու ընթացքում: Ավելին, ժամանակի ընթացքում ընկերությունը վերանայել է բազմաթիվ ծրագրեր և մոտեցումներ, որոնք պայմանավորված են եղել հնչեցված անհանգստություններով»,- նշել է նա:
Պատասխանելով հարցին, թե հանուն նոր աշխատատեղերի ստեղծման արժե կասկածի տակ դնել մարդկանց առողջություն ու շրջակա միջավայրի մաքրությունը, հատկապես այն պարագայում, որ Ամուլսարը շահագործելու հայտ ներկայացրած «Գեոթիմ» ՓԲԸ-ն ներկայացված նախագծում ռիսկերի գնահատում չի իրականացրել, պատասխանել է. «Ակնհայտ է, որ հանքավայրի շահագործումը, իբրև տնտեսական նախագիծ, բացառիկ է և արդյունավետ: Իրապես, այն հնարավորություն կստեղծի բազմաթիվ մարդկանց ունենալ կայուն և բարձր վարձատրվող աշխատանք: Ավելին, դեռևս հանքավայրը չի շահագործվում, սակայն “ԳԵՈԹԻՄ” ընկերության կողմից մեր մարզի Սարավան, Գնդեվազ և Ջերմուկ համայնքներում իրականացվում են մեծ ծավալի սոցիալական ծրագրեր, իսկ Գնդեվազ և Սարավան համայնքների բյուջեներ վճարվում են համայնքի բյուջեի եկամուտները բազմապատիկ անգամ գերազանցող հողի վարձակալական վճարներ: Ինչ վերաբերում է շրջակա միջավայրի վրա ազդեցության բացասական գործոններին, ապա դրանք պետք է կառավարվեն և նվազագույնի հասցվեն»:
Ի՞նչն է փոխել ձեր կարծիքը, հարգարժան պարոն Ղազարյան, բացի, իհարկե ձեր պաշտոնից և կառավարող քաղաքական մեծամասնությունից:
