Լեռնային Ղարաբաղում բնականոն կյանքը խաթարված է, և հումանիտար ճգնաժամը ծավալվում է ամբողջ թափով։
Այդ մասին այսօր՝ հունվարի 26-ին, կառավարության նիստում հայտարարեց ՀՀ վարչապետ Նիկոլ Փաշինյանը՝ անդրադառնալով Լաչինի միջանցքի փակման հետևանքով Արցախում ստեղծված իրավիճակին։
Վարչապետն ընգդծեց, որ մանկապարտեզների սաները, դպրոցականներն ու ուսանողները մեկ ամիս է՝ զրկված են 21-րդ դարի ամենակենսական իրավունքներից մեկից՝ կրթության իրավունքից.
«Արդեն մեկ ամիս է՝ ԼՂ մանկապարտեզները, դպրոցները, բուհերը փակ են, չեն աշխատում։ Վերջին անգամ նման բան եղել էր 44-օրյա պատերազմի ժամանակ, իսկ այն իրավիճակում, երբ հրանոթները չեն կրակում, կրթական հաստատությունները փակվել էին միայն կորոնավիրուսի համավարակի պատճառով։ Այս անգամ, սակայն, COVID-19-ի վիրուսը չէ կրթական հաստատությունների չաշխատելու պատճառը, այլ Ադրբեջանի «բնապահպանական մտահոգությունները»»,-նշեց Փաշինյանը։
Նրա խոսքով, Ադրբեջանը դրանով չբավարարվելով, պարբերաբար փակում է նաև ԼՂ-ն սնուցող գազի խողովակը, ինչն ակնհայտորեն դատապարտելի է։
«Բաքվի պլանը հետևյալն է` ԼՂ-ում տնտեսական, հոգեբանական ճնշումը հասցնել ինչ-որ մի կուլմինացիոն կետի, դրանից հետո մի քանի օրով բացել միջանցքը՝ ակնկալելով, որ ԼՂ հայերը զանգվածաբար կլքեն իրենց հայրենիքը։ Սա, իհարկե, էթնիկ զտման բացահայտ քաղաքականություն է»,–շեշտեց ՀՀ կառավարության ղեկավարը։
Փաշինյանը հավելեց նաև, որ այս սադրիչ գործողություններով Ադրբեջանը նպատակ ունի խափանել նաև խաղաղության օրակարգը։ Միաժամանակ, վարչապետը հավաստիացրեց, որ Հայաստանը շարունակում է հետևողական լինել խաղաղության օրակարգի առաջմղման ջանքերում։
