Դուք չեք նախագահում, այլ ես․ ԵԽԽՎ նախագահը լռեցրել է ադրբեջանական պատվիրակության ղեկավարին

«Դուք չեք նախագահը, ես եմ նախագահը»:

ԵԽԽՎ լիագումար նիստի ընթացքում Լաչինի թեմայով քննարկման ժամանակ նման պատասխան է տվել ԵԽԽՎ նախագահ Թինի Կոքսը՝ արձագանքելով կառույցում ադրբեջանական պատվիրակության ղեկավար Սամադ Սեիդովի դժգոհության, թե իրեն՝ որպես ադրբեջանական պատվիրակության ղեկավարի, խոսելու հերթ չի հասել, ու դա ցույց է տալիս այն, որ վեհաժողովը կողմնակալ է։

Քննարկման համար նախատեսված ժամանակը լրանալու պատճառով Կոքսը հայտարարել է՝ դեբատն ավարտվել է, ինչի պատճառով Սամադ Սեիդովի ելույթի հերթ չի հասել։

Նա լիագումար նիստերի դահլիճում հայտարարել է, թե վեհաժողովը կողմնակալ մոտեցում ունի։

Ի պատասխան՝ Թինի Կոքսը նշել է, որ Սեիդովը ծանոթ է կարգին, ժամանակը սպառվել է.

«Եթե հայերը կարողացան իրենց խոսքը ներկայացնել, բայց ես՝ որպես պատվիրակության ղեկավար, չկարողացա, ուրեմն սա կողմնակալ վերաբերմունք է»,- հայտարարել է Սեիդովը։

ԵԽԽՎ նախագահը վրդովվել ու պատասխանել է. «Մյուս անգամ չեմ հանդուրժելու Ձեր կողմից կարգի խախտումը։ Դուք փորձառու անդամ եք այս վեհաժողովում և գիտեք, որ չի կարելի այդպես վարվել, այստեղ ես եմ նախագահը»։