Այսօր մեկնարկում են ՀՀ-ն ընդդեմ Ադրբեջանի գործով դատավարական լսումները

ՄԱԿ-ի Արդարադատության միջազգային դատարանում այսօր մեկնարկում են Հայաստանի և Ադրբեջանի միջև դատավարական լսումները։ Այս մասին հայտնում է միջազգային իրավական հարցերով ՀՀ ներկայացուցիչը։

Փաստաթղթերի համաձայն՝ կողմերը դատարան էին դիմել` պահանջելով դատավարության ընթացքում լրացուցիչ ապահովման միջոցներ կիրառել։

Հայաստանը պահանջում է կիրառել հետևյալ միջանկյալ միջոցները․

1․ Ադրբեջանը պետք է դադարեցնի Լաչինի միջանցքով երկու ուղղություններով անարգել ազատ երթևեկությունն արգելափակող իբր «բողոքի ցույցերի» կազմակերպումն ու աջակցությունը։

2․ Ադրբեջանը պետք է ապահովի բոլոր անձանց, տրանսպորտային միջոցների եւ բեռների անխափան ազատ տեղաշարժը Լաչինի միջանցքով երկու ուղղություններով։

Նշենք, որ Ադրբեջանի հայցի լսումները տեղի կունենան հունվարի 31-ին։

Հավելենք, որ Հայաստանն ընդդեմ Ադրբեջանի գործով լսումները տեղի կունենան այսօր՝ Երևանի ժամանակով 13:00-15:00 և 19:00-21:00-ին։

Իսկ Ադրբեջանն ընդդեմ Հայաստանի գործով լսումները նախատեսված են վաղը՝ հունվարի 31-ին՝ միևնույն ժամերին։