Այսօր առավոտից Տավուշի մարզի Արճիս գյուղի բնակիչները փակել են Ալավերդի-Բագրատաշեն միջպետական ճանապարհը։ Պատճառը մեկն է՝ խմելու ջուր են ուզում։ Գյուղացիները հավաստիացնում են՝ տարիներ շարունակ գյուղը ունեցել է խմելու ջրի խնդիր, իսկ այս տարի դրան գումարվել է նաև անասելի տապը, արդյունքում չորացել են աղբյուրները, ուստի ջուր բերելու համար ծեր ու մանուկ, տղամարդ և կին, ոտքով մի քանի կիլոմետր ճանապարհ են կտրում-անցնում։
Մեզ հետ զրույցում բնակիչները նշեցին, որ իրենց գյուղի տարածքով է անցնում Ստեփանավան գնացող ջրագիծը, որի վրա ընդամենը պոմպ պետք է տեղադրվի՝ լուծելով գյուղի խմելու ջրի հարցը։ Մարզպետարանից տեղյակ են խնդրի մասին, այցելեն են գյուղ, նախահաշիվ կազմել, որպեսզի ներկայացնեն կառավարության նիստում, սակայն խնդիրը այդպես էլ կառավարություն չի հասել։
Մեր թղթակցի հարցին՝ ի՞նչ պահանջ ունեն այժմ, գյուղացիները պատասխանեցին, որ դրանք առայժմ երկուսն են՝ հարցը պետք է հասնի կառավարություն և քննարկվի առաջիկա նիստում, և երկրորդ՝ այդ ընթացքում տրվի ինչ-որ միջանկյալ լուծում։
Տեղեկացնենք նաև որ հենց նոր ժամանեց նաև Տավուշի մարզպետ Հայկ Չոբանյանը, իսկ միջպետական ճանապարհին մեքենաների կիլոմետրերով հերթ է գոյանում։
