ԼՂՀ ՊԲ նախկին հրամանատար, Արցախի Հանրապետության Անվտանգության խորհրդի նախկին քարտուղար Սամվել Բաբայանի համոզմամբ՝ բանակցային թեմա հանդիսացող բոլոր փաթեթները կետ առ կետ գրելուց և ներկայացնելուց հետո, պետք է լինեն բանակցողներ:
«Կապ չունի, թե ով, ում Ադրբեջանն ընդունում է, նա էլ թող բանակցի», -«Ազատություն» ռադիոկայանի հետ զրույցում ասել է նա:
Սամվել Բայանի խոսքով՝ Ադրբեջանն պահանջում է, որ Կաշենի հանքավայրը չաշխատի, իսկ հայկական կողմն ասում է, որ պիտի աշխատի, 2000 մարդ այնտեղ աշխատանք ունի:
«Բայց եկեք մտածենք, մենք ե՞նք ներդրում անում, և վերջնական ապրանք արտադրում ձեզ տալիս ու արտադրանքը վաճառում, թե դուք եք ներդրում անում կամ ներդրող բերում, ապա այդ ապրանքը տանում եք, բայց հարկերը մուծում եք մեզ: Տարբեր ձևեր կան,պետք է հասկանալ,այդ փաստաթուղթը պատրաստել և անցնել գործի»,-ասել է նա:
Անդրադառնալով Ադրբեջանի այն պահանջին, թե Արցախի ինքնապաշտպանական ուժերը պետք է զինաթափվեն, ԼՂՀ ՊԲ նախկին հրամանատարը նկատում է, որ այն դեպքում, երբ ինքը շրջափակում է, զենքը դեմ է տալիս և ասում ավտոմատը ցած դիր, ապա այդպես չի կարող լինել:
« Ես ասում եմ, կներեք, եկեք փոխվստահություն ձեռք բերենք: Դուք հեռացրեք ձեր զորքերը և այլն, և այլն: Ես վստահ եմ, որ կարելի է անել այդ լուծումները: Առաջին հերթին պետք է լինի փոխվստահություն, փոխհամաձայնություն: Հիմա, եթե փոխվստահությունը չկա, 30 տարի չի եղել, ապա մենք այս տարածաշրջանում մեր դիրքն ենք ընդունելու, սառեցնելու ենք կոնֆլիկտը, հետո ինչ-որ ուժեր փորձելու են այս կամ այն կողմից զինեն, օգնեն, նոր պատերազմներ անեն, իրենց գլոբալ հարցերը լուծելու համար: Եթե սա Ադրբեջանը գիտակցում է ու հասկանում է,և պատրաստ է, ինչպես նաև արցախյան կողմը պատրաստ լինի այդ բանակցություններին, ապա կարելի է լուրջ լուծումներ գտնել և փոխվստահություն ներշնչել»,- համոզմունք է հայտնել Ս. Բաբայանը՝ նկատելով, որ եթե Ադրբեջանն այսօր խոչընդոտում է դեպի Արցախ էլեկտրաէներգիայի,գազի մատակարարումը, ապա պարզ է, որ Արցախը, որի էներգետիկ ռեսուրսները ջրով են, Սարսանգից ջուր է բաց թողնելու էլեկտրաէներգիա ստանալու և բնակչությանն ապահովելու համար:
«Հետո Ադրբեջանը մայիսի վերջին ասելու է ջուր տուր, որ ոռոգման համակարգն աշխատի: Հայերը ջուր չեն տալու, ասելու է, թե միտումնավոր չեն տալիս՝ չգիտակցելով, որ ինչքան ինքն ամբողջ ձմռանը խոչընդոտում է էներգամատակարարումը, ապա հայկական կողմը պարտադրված ծախսում է այդ ջուրը», -հավելել է ԱՀ Անվտանգության խորհրդի նախկին քարտուղարը:
Խոսելով Լաչինի միջանցքում անցակետ տեղակայելու և մարդկանց ու բեռների ստուգումներ իրականացնելու Ադրբեջանի պնդման մասին, Սամվել Բաբայանը նշել է, որ Արցախում, չկա հայ տղամարդ, որ զենք վերցրած չլինի, իսկ Ադրբեջանը, որ մի քանի հազար միջազգային հետախուզումներ է հայտարարել, կարող է ցանկացած մեկին բռնել և տեռորիստ հայտարարել:
«Սա խնդիր է, պետք է լուծվի, փոխվստահության գնա, դրանից հետո երկրորդ, երրորդ քայլն անել:»,-ընդգծել է նա:
Ըստ Բաբայանի՝ Ադրբեջանը մանդատ չի տվել և չի տալու ՌԴ խաղաղապահ զորակազմին, ուստի մանդատային տարածքների փորձն ուսումնասիրելով, պետք է գոնե Արցախի Հանրապետության իշխանությունը Ռուսական խաղաղապահ ուժերի հետ պայմանագիր կնքի:
