ԼՂՀ պաշտպանության բանակի նախկին հրամանատար և ԱՀ Անվտանգության նախկին քարտուղար Սամվել Բաբայանը «Ազատություն» ռադիոկայանի հետ զրույցում հայտնել է, որ դեռ 1997 թվականի նոյեմբերին անձամբ է հանդիպել ՀՀ առաջին նախագահ Լևոն Տեր Պետրոսյանի հետ և նրան ներկայացրել կարգավորման վերաբերյալ պաշտոնական Ստեփանակերտի պատկերացումների փաթեթը, ինչպես նաև քարտեզը, թե ինչ տարածքներ պիտի պահպանվեին:
«Այն, որ ասում են թե ղարաբաղյան կողմն ընդհանրապես դեմ էր մի թիզ հող տալուն, այդ ամբողջը սուտ է և հենված է ստի վրա: Մենք խոսում էինք, որ այդ փաստաթղթում Լաչինն (Քաշաթաղ) ու Քյալբաջարը (Շահումյանի շրջան) պետք է ընդգրկված լինեն և մենք պետք է 8 հազար քառակուսի կիլոմետր տարածք պահպանենք 12 հազար 700 քառակուսի կիլոմետրից:
Երկրորդ խնդիրը ռազմավարական տարածքներին է վերաբերում՝ Հայաստանի հետ միավորող:
Բացի այդ՝ խնդիրը հետևյալն է, որ Արցախը 1921-23 թվականներին, երբ մտցրել են Ադրբեջանի կազմի մեջ, նոր քարտեզագրում են կատարել՝ 8000 քառակուսի կիլոմետր տարածքի վրա: Կարող եմ փաստաթղթերով ներկայացնել: Այդ 8 հազար քառակուսի կիլոմետրը մենք ձևակերպել ենք, որպես ռազմավարական այն տարածքներ, որոնք անվտանգ և պաշտպանված են լինելու»,-մանրամասնել է Ս. Բաբայանը:
Նրա խոսքով՝ Լևոն Տեր Պետրոսյանը, սակայն իրեն ասել էր, որ Լաչինի միջանցքից բացի, երկրորդը հնարավոր չի լինելու:
Ըստ Բաբայանի՝ կան փաստաթղթեր, որոնք հաստատում են, որ ըստ ամերիկյան առաջարկի Արցախն Ադրբեջանի մաս էր նախատեսվում, ուստի ամեն ինչ այնքան էլ այնպես չէ, ինչպես ներկայացվում է:
