«Հայկական կողմը Ադրբեջանին ՀՀ տարածքով միջանցք տրամադրելու ո՛չ գրավոր, ո՛չ էլ բանավոր համաձայնություն չի տվել». Չախոյան

ՀՀ վարչապետի աշխատակազմի ղեկավարի տեղակալ Տարոն Չախոյանը կրկին անդրադարձել է որոշ ընդդիմադիր քաղաքական գործիչների այն պնդումներին, թե նոյեմբերի 9-ի եռակողմ հայտարարությունից բացի, կա նաև Հայաստանի ինքնիշխան տարածքով Ադրբեջանին միջանցք տալու եռակողմ բանավոր պայմանավորվածություն։

Չախոյանը հիշեցրել է, որ միջանցք տալու մասին կեղծ պնդումը նախ դաշտ է նետել Կոնստանտին Զատուլինը, ապա Իշխան Սաղաթելյանը, Արծվիկ Մինասյանը՝ նկատելով, որ օրեր առաջ էլ նույն կեղծ պնդումը հնչել է Լաչինի միջանցքի փակման թեմայով ԱԺ-ում՝ ընդդիմադիրների կազմակերպած լսումների ժամանակ։

«Կրկնում եմ՝ հայկական կողմը Ադրբեջանին ՀՀ տարածքով միջանցք տրամադրելու մասին ո՛չ գրավոր, ո՛չ էլ բանավոր համաձայնություն երբևէ չի տվել։ Իսկ այն անձինք, ովքեր ջանասիրաբար փորձում են տարածել այս կեղծ թեզը, ծառայություն են մատուցում Ալիևին և այն պետություններին, որոնք շահագրգռված են ՀՀ տարածքով միջանցք ստանալու հարցում»,- «Ֆեյսբուք»-ի իր էջում գրել է նա:

Նմանատիպ հակապետական պահվածք դրսևորողների համար, ըստ Չախոյանի, թերևս տեղին են Վազգենի Սարգսյանի խոսքերը. «Մեր հացն ուտող, ուրիշի դռանը հաչող․․․»։