Ղարաբաղի մելիքությունների տարածքը կազմում էր 24 հազար քառակուսի կիլոմետր, երբ ռուս-պարսկական պատերազմի ժամանակ՝ 1813 թվականին, Արցախը միացավ Ռուսաստանին:
Այս մասին «Ազատություն» ռադիոկայանի հետ զրույցում ասել է ԼՂՀ ՊԲ նախկին հրամանատար, ԱՀ Անվտանգության խորհրդի նախկին քարտուղար Սամվել Բաբայանը անդրադառնալով ՌԴ արտգործնախարար Սերգեյ Լավրովի օրերս հնչեցրած հայտարարությանը:
«Նահանգ սարքելուց հետո լուծարել են: Այնուհետև ռուսական կայսրությունը փլուզվել է և դարձել Սովետական Միություն: 1920 թվականի ապրիլին խորհրդային 21-րդ բանակն մտել և Ադրբեջանով եկել է Արցախ ու արցախցիների հետ ստորագրել փաստաթուղթ, որ խոստանում են անկախություն, ինքնուրույնություն և նոր միայն արցախցիները բաց են թողնում, որ տարածքում տեղակայվեն այդ զորքերը:
Դրանից հետո, 1921 թվականի Կովկասի բյուրոյի որոշմամբ Ղարաբաղը տալիս Ադրբեջանին: 1923 թվականին էլ փաստաթուղթ են ստորագրում՝ կազմել Արցախի քարտեզը՝ 8000 քառակուսի կիլոմետրով»,- ասել է Սամվել Բաբայանը՝ նշելով, որ այժմ Արցախի տարածքը կազմում է 3100 քառակուսի կիլոմետր, ուստի հարց է առաջանում, թե ուր է մնացած 4900-ը:
