Նիկոլ Փաշինյանը Սահմանադրական դատարանի հիմնադրման 27-ամյակին նվիրված միջոցառմանը նշել է, որ առկա խնդիրները կարելի է բաժանել երկու մասի. խնդիրներ, որոնք թույլ չեն տվել կայանալ պետական ինստիտուտները, և խնդիրներ, որոնք առաջացել են ինստիտուտների կայացած չլինելու պատճառով:
«Սահմանադրական արդարադատությունը կարևոր է ոչ միայն իրավիճակները հաղթահարելու, ոչ միայն առաջացած փակուղային իրադրություններից ելք ցույց տալու և ելք հարթելու համար, այլև շատ կարևոր է, որ սահմանադրական արդարադատությունը ձևավորի մտածողություն, որն իր բնույթով ինստիտուցիոնալ է, իր բնույթով պետական է: Սա եմ համարում սահմանադրական արդարադատության կարևորագույն գործառույթներից մեկը, ընհանրապես, դատական համակարգի և բոլոր ինստիտուտների, որովհետև ի վերջո մենք չունենալով անկախ պետություն, ունեցել ենք որոշակի մտածողություն:»-նկատել է վարչապետը:
Նիկոլ Փաշինյանը նկատեց, որ վերջերս մի քննարկման ժամանակ, արձանագրեցին, որ մինչև այսօր լուծված չէ ազգ և ժողովուրդ հասկացությունների հարաբերությունը: Այն դեպքում, երբ Սահմանադրությունը շատ հստակ տվել է այդ տրամաբանությունը, որովհետև ժողովուրդը պետականաստեղծ միավորն է, ինստիտուտը, ազգի հատկանիշները մի փոքր այլ են, որը շատ ուղիղ կարող է նաև կապված չլինել պետության, պետական ինստիտուտների հետ:
