Այսօր ԱԺ նիստից հետո լրագրողների հետ զրույցում Ալեն Սիմոնյանը, անդրադառնալով Սեյրան Օհանյանի նկատմամբ հանրային քրեական հետապնդում հարուցելուն համաձայնություն տալու մասին ՀՀ գլխավոր դատախազի միջնորդագրին և այդ պնդումներին, թե իշխանությունը փորձում է հանրությանը շեղել, ասաց՝ ցավում է, որ նիստը փակ է անցել, որովհետև հնչած թեմաներն ու հարցերը հետաքրքիր պատասխաններ են գտել:
«Չեմ կարծում, որ որևիցե գործողություն ընդդիմության վերջին ակցիաներից հետո կարող է ՀՀ ժողովրդին որևէ բանից շեղել: Նրանք գերագնահատում են իրենց դերը հայաստանյան քաղաքական դաշտում: Նրանց քաղաքական գործունեությունը հենված է զուտ սահմանին տեղի ունեցող հարձակումների և թշնամու արած քայլերի հիման վրա դիվիդենտներ և օրակարգեր ձևավորելով: Կարող եմ նրանց հանգստացնել՝ հիմնական օրակարգից ՀՀ ժողովուրդը չի շեղվելու, թող իրենց չգերագնահատեն»,- ասաց նա:
