ԱԺ փոխնախագահ Ռուբեն Ռուբինյանը խորհրդարանում կայացած նիստում անդրադարձել է Թուրքիա և Սիրիա փրկարարներ ուղարկելու նախապատմությանը։
Նրա խոսքով, առաջին անգամ բնական աղետի ժամանակ Հայաստանն օգնություն է տրամադրել Թուրքիային 1999 թվականին Ռոբերտ Քոչարյանի նախագահության օրոք։
Հայաստանը ոչ միայն ցավակցել է, այլև այն ժամանակ կրկին փրկարարական խումբ և հումանիտար օգնություն է ուղարկել Թուրքիա, նշել է ԱԺ փոխխոսնակը․
«Հետագայում 2011 թվականին արդեն Սերժ Սարգսյանի նախագահության օրոք Վանի երկրաշարժից հետո առաջարկ է արվել հումանիտար օգնություն ուղարկել, որից հետո այն ժամանակվա վարչապետ Էրդողանը շնորհակալություն էր հայտնել, բայց ասել էր, որ օգնություն պետք չէ»։
Անդրադառնալով «Հայաստան» դաշինքի պատգամավոր Անդրանիկ Թևանյանի այն հայտարարությանը, թե այլ երկրներում էլ է երկրաշարժ եղել, ինչու Հայաստանն օգնություն չի ուղարկել՝ Ռուբինյանն ասել է.
«1999 թվականին երկրաշարժեր են եղել, բացի Թուրքիայից նաև Թայվանում, Կոլումբիայում, Հունաստանում, Հնդկաստանում, Աֆղանստանում, Մեքիսկայում, Ալժիրում, Ֆիլիպիններում, ԱՄՆ-ում և այսպես շարունակ, հիմա հարց՝ Ռոբերտ Քոչարյանը ստորադասե՞լ է հայ-մեքսիակական բարեկամական հարաբերությունները Թուրքիայի հետ հարաբերություններին: Ինչո՞ւ է Հայաստանը 1999 թվականին փրկարար խումբ ուղարկել միայն Թուրքիա և ոչ եղբայրական Հունաստան»:
