Քվեբեկի ԱԺ-ն միաձայն ընդունեց Արցախի շրջափակումը դատապարտող բանաձև

Կանադական Քվեբեկի Ազգային Ժողովը միաձայն ընդունել է ԼՂ շրջափակումը դատապարտող բանաձև։

«Փետրվարի 8-ին կայացած Կանադայի Քվեբեկ նահանգի Ազգային Ժողովի նիստի ընթացքում, Ազատական կուսակցության անդամ Սոնա Լախոյանն ընթերցեց Ադրբեջանի կողմից Արցախի շրջափակումը դատապարտող բանաձևը, որն ընդունվեց Ազգային Ժողովի բոլոր կուսակցությունների կողմից։ Coalition Avenir Québec (CAQ), Quebec Liberal Party (QLP), Québec solidaire (QS) և Parti Québécois (PQ) կուսակցությունների պատգամավորները միաձայն կողմ քվեարկեցին բանաձևին»,-ասվում է Քվեբեկի Հայ Դատի Հանձնախմբի հայտարարության մեջ։

Հատկանշական է, որ Քվեբեկի Ազգային ժողովի բոլոր կուսակցությունները բանաձևի համահեղինակ են եղել։

Նշվում է նաև, որ բանաձևը պիտի փոխանցվի Կանադայի արտաքին գործերի նախարարությանը, Քվեբեկի Հայ Դատի հանձնախմբին և Կանադայում Ադրբեջանի դեսպանատանը։