Թուրքիայում 8 մարդ է ձերբակալվել երկրաշարժի հետևանքով փլուզված շենքերում հայտնաբերված շինարարական թերությունների հետ կապված:
Այդ մասին հայտնել է Habertürk հեռուստաալիքը։
«Շանլըուրֆայում ձերբակալվել է 8 կասկածյալ, որոնց նկատմամբ կալանքի որոշում է կայացվել երկրաշարժի հետևանքով փլուզված շենքերում հայտնաբերված շինարարական թերությունների և սյուներ կտրելու գործողությունների առնչությամբ», – հաղորդել է հեռուստաալիքը։
Ավելի վաղ, Թուրքիայի նախագահ Ռեջեփ Թաիբ Էրդողանը խոստովանել էր, որ աղետի գոտում նաև թալանի դեպքեր են արձանագրվել։
Նա խոստացել է, որ այդ խնդիրները կլուծվեն։
Հիշեցնենք, որ վերջին տվյալներով Թուրքիայում տեղի ունեցած երկրաշարժի հետևանքով զոհվել է շուրջ 21 հազար մարդ, վիրավորվել է ավելի քան 18 հազար քաղաքացի։
