Վերջին օրերին ՌԴ-ն աննախադեպ կորուստներ է կրել․ հետախուզություն

Ռուսական բանակը վերջին երկու շաբաթվա ընթացքում ամենամեծ կորուստներն է կրել Ուկրաինայում պատերազմի սկզբից ի վեր։ Այս մասին ասվում է Մեծ Բրիտանիայի պաշտպանության նախարարության հետախուզության ամենօրյա զեկույցում։

Գերատեսչությունը նման եզրակացություններ է արել՝ հիմնվելով Ուկրաինայի գլխավոր շտաբի զեկույցի վրա։

«Չնայած պաշտպանության նախարարության հետախուզությունը չի կարող ստուգել Ուկրաինայի մեթոդաբանությունը, այդուհանդերձ, միտումները, որոնք ցույց են տալիս տվյալները, ամենայն հավանականությամբ, ճշգրիտ են», – ասվում է Մեծ Բրիտանիայի ՊՆ հրապարակած փաստաթղթում։

Ըստ այդմ, վերջին շաբաթվա ընթացքում Ռուսաստանը օրական կորցրել է միջինը 824 զինվոր։ Սա ամենաբարձր ցուցանիշն է նախորդ տարվա մարտից ի վեր։ Այն ավելի քան 4 անգամ գերազանցում է 2022 թվականի հունիս-հուլիսին գրանցված ցուցանիշը։

Ռուսական կողմի զոհերի թվի աճը, հավանաբար, պայմանավորված է մի շարք գործոններով, այդ թվում՝ անձնակազմի վատ պատրաստվածությամբ, ռազմաճակատում համակարգման և ռեսուրսների պակասով: Որպես օրինակ՝ բրիտանացի զինվորականները բերում են ռուս զինվորականների գործողությունները Ուգլեդարում և Բախմուտում։