Արցախի դպրոցներում վերսկսվել են դասերը

Գազով ջեռուցվող դպրոցներում տեղադրվել են փայտի վառարաններ և արդեն անցած շաբաթ օրվանից վերսկսվել են պարապմունքները՝ 9-ից 12-րդ դասարանցիների համար:

Այսուհետ դպրոցները 5-օրյայից անցնելու են 6-օրյա ռեժիմի ու շաբաթ օրը լրացնելու են ջեռուցման բացակայության պատճառով բաց թողած ժամերը:

Մայրաքաղաքի Եղիշե Չարենցի անվան հիմնական դպրոցում գործում է թվով 5` 9-րդ դասարան՝ 130 աշակերտով: Բոլոր 5 դասարաններում տեղադրված են փայտի վառարաններ:

Պատասխանատուները վաղ առավոտից են հոգ տարել, որ դասարանները տաք լինեն: Մի վառարան էլ հատկացվել է ուսուցչանոցին:

«Առավոտյան 7.30 վառարանները վառել ենք, որպեսզի երեխան գա ու չմրսի: հետևողական աշխատանքը տանում ենք, որպեզի վառարանները նորմալ վառվեն, իհարկե պահպանելով անվտանգության կանոնները»,-Արցախի Հանրային հեռուստաընկերությանն ասել է Ստեփանակերտի հ.7 հիմնական դպրոցի տնօրեն Անահիտ Պողոյանը։