Թուրքիա օգնություն ուղարկելու ու Լաչինի միջանցքի հարցերն անհամեմատելի են․ Հովհաննիսյան

ԱԺ-ում խորհրդարանական ճեպազրույցների ժամանակ ՔՊ խմբակցության քարտուղար Արթուր Հովհաննիսյանն անդրադարձել է այն քննարկումներին, որոնք արվում են հանրության շրջանում ՀՀ-ից Թուրքիա ուղարկված օգնության ու Արցախում շրջափակման հետևանքով ստեղծված հումանիտար ճգնաժամի շուրջ։

«Անկեղծորեն զարմացած եմ այս բովանդակությամբ հարցերից։ Լաչինի միջանցքը փակ է, որովհետև չի կատարվում նոյեմբերի 9-ի պայմանավորվածության 6-րդ կետը, այն փակել են Ադրբեջանի իբր «բնապահպանները» Արցախում հումանիտար ճգնաժամ առաջացնելու, Արցախի ժողովրդին ահաբեկելու համար։

Հայաստանի ու Թուրքիայի միջև սահմանը փակվել է միակողմանի՝ Թուրքիայի կողմից։ Թուրքիայում տեղի է ունեցել ավերիչ երկրաշարժ, ՀՀ-ն մարդասիրական օգնություն ուղարկելու առաջարկ է արել, Թուրքիան համաձայնել է ու բացել է, Թուրքիան է բացել իր կողմից փակած սահմանը»,- ասել է իշխանական պատգամավորը։

Նրա պնդմամբ, այս երկու հարցերը անհամեմատելի են։

«Այս հարցը անհամեմատելի է Լաչինի միջանցքի փակման հարցի հետ ու այս իրողությունները հնարավոր չէ մեկ հարթության մեջ համեմատել: Թե ինչու ՀՀ-ի մոտ ավելի արագ ստացվեց պայմանավորվել Թուրքիայի հետ, որովհետև Թուրքիայում զոհերի քանակը հասել է 30․000-ի, դրա համար Թուրքիայի իշխանությունները աշխարհի բոլոր երկրներից ընդունում են օգնություն»,- նշել է Հովհաննիսյանը։