Թուրքիայում զոհված հայերի թիվը հասել է 11-ի․ անունները հայտնի են

Սիրիայի և Թուրքիայի ավերիչ երկրաշարժերի հետեւանքով զոհվել է 13 հայ։

Այս մասին այսօր լրագրողների հետ հանդիպմանն ասել է ՀՀ Սփյուռքի հանձնակատարի գրասենյակի ռազմավարությունների մշակման բաժնի պետ Հովհաննես Ալեքսանյանը։

Նշելով, որ նրանցից 11-ը զոհվել են Թուրքիայում, պաշտոնյան հրապարակել է նաև զոհերի անունները․

«Թուրքիայի Մալաթիա քաղաքում ունենք չորս զոհ՝ Սամիթ Թաբաշ, Աիդա Թաբաշ, Ալեքս Թաբաշ եւ Մարիամ Քարաթաշ։ Իսքենդերունում ունենք մեկ զոհված ընտանիք, անդամներն են՝ Դշխուն Մեսրոպյան, Արմիկ Մեսրոպյան, Մեսրոպ Մեսրոպյան եւ Պայծառ Սիլահլի։

Անտիոքում զոհվել է Անտուան Հորոսը, Տիգրանակերտում՝ երգչուհի Զիլան Տիգրիսը, նա արդեն հուղարկավորվել է եւ Ադըյամանում զոհվել է Յոհաննա-Կարոլինա Կապը, որն էքսկուրսավար էր»։

Ալեքսանյանը մանրամասնել է, որ Հալեպում զոհված հայերի թիվն այս պահին երկուսն է․ զոհվել են Միրնա Թեքեճյանը եւ որդին՝ Ալպեր Թեքեճյանը։