Արցախի պետական համալսարանի Պատմության և քաղաքագիտության ամբիոնի նախաձեռնությամբ այսօր՝ փետրվարի 13-ին, բուհում կազմակերպվել է միջոցառում՝ նվիրված 1988 թ. փետրվարի 13-ից տասնյակ հազարավոր մարդկանց մասնակցությամբ մարզկենտրոն Ստեփանակերտում մեկնարկած զանգվածային ցույցերին:
«Արցախպրես»-ի թղթակցի հաղորդմամբ՝ միջոցառումը կրում էր «13 փետրվար 1988թ.-13 փետրվար 2023թ.» խորագիրը։ ԱրՊՀ Պատմության և քաղաքագիտության ամբիոնի վարիչ, պատմական գիտությունների թեկնածու Նունե Սարումյանը մեզ հետ զրույցում նշել է, որ Շարժման օրերին ժողովուրդն իր ձայնը բարձրացրեց հանուն ազատ ինքնորոշման իրավունքի։
«Մենք ունեցանք հերոս տղաներ, որոնք զինվորագրվեցին հայրենիքի ազատագրության գործին, իրենց կյանքը զոհաբերեցին, որպեսզի մենք կարողանանք ապրել ու ստեղծել մեր հայրենիքում։ Մինչ օրս մենք կանգուն ենք այն հողում, որն ազատագրել են իրենք՝ մեզ համար անկախ ապրելու և գործելու պայմաններ են ստեղծելով»,-ընդգծել է Ն. Սարումյանը։
Նրա խոսքով՝ տղաներն իրենց անձնուրացությամբ ծնողին ու հայրենիքին նվիրվածության գաղափարախոսություն նաև կերտեցին, որը շարունակվում է այսօր։
«Սկսած 1988 թվականից մինչ օրս մեր ուսանողությունը ցույց տվեց, թե որն է հայրենասիրությունը, իսկ այս դժվար պայմաններում նա իր կեցվածքով ցույց է տալիս, որ հերոսական պայքարը շարունակվում է»,-հավելեց մեր զրուցակիցը։
Միջոցառման ընթացքում ներկայացվել են Արցախյան շարժմանը մասնակցած ուսանողների սխրագործությունները:
Ելույթներով հանդես են եկել ԱրՊՀ ուսանողները։
