Թուրքիայի Հաթայ նահանգում միակ քաղաքը, որտեղ գեթ մի շենք չի փլվել՝ Էրզինն է։
Թուրքական Cumhuriyet–ը զրուցել է բոլորի ուշադրության կենտրոնում հայտնված քաղաքի քաղաքապետի հետ՝ հասկանալու, թե ինչն է այդքան ամուր շենքերի գաղտնիքը:
Էրզինի քաղաքապետ, ընդդիմադիր «Ժողովրդահանրապետական» կուսակցության անդամ Օքքեշ Էլմասօղլուն քաղաքում որեւէ շենքի չփլվելը եւ զոհ չունենալը բացատրել է ընդամենը օրենքի շրջանակներում աշխատանքով։
Քաղաքապետը շեշտել է, որ Էրզինում կատեգորիկ արգելված են ինքնակամ շինությունները կամ դրանց թույլտվություն տալը։ Նա պնդել է, որ նույնիսկ իր բարեկամներին թույլ չի տվել ինքնակամ շինություն կառուցեն, իսկ կառուցվող շենքերի հետ կապված մանրամասն ստուգվում են կառուցման ստանդարտները։
«Իմ խստության պատճառով ինձ շատ են ասում, թե արդյոք ինձնից ավելի կարգապահ քաղաքապետ կա՞ Թուրքիայում»,–ասել է Էրզինի քաղաքապետը։
