Վրաստան ամենամեծ թվով այցելուները եղել են ՌԴ-ից, Թուրքիայից և Հայաստանից

2022 թվականին Վրաստան ամենամեծ թվով այցելուները եղել են Ռուսաստանից, Թուրքիայից և Հայաստանից: Նման տվյալներ է հրապարակել Վրաստանի Ազգային վիճակագրության գրասենյակը։

Ըստ այդմ, այցելուների 23,3%-ը եղել են Ռուսաստանից: Երկրորդ հորիզոնականում է Թուրքիան՝ ընդհանուր այցելուների թվի 18,1 %-ով: Իսկ Հայաստանից Վրաստան է ժամանել ընդհանուր զբոսաշրջիկների թվի 13,5 %-ը:

Անցյալ տարվա ընթացքում Վրաստան ամենամեծ թվով այցելությունները կատարել են ՌԴ քաղաքացիները՝ 1,1 մլն, Թուրքիայի քաղաքացիները՝ 925,6 հազար և Հայաստանի քաղաքացիները՝ 742,6 հազար:

Միջազգային ուղևորների ժամանումների ընդհանուր թիվը Վրաստան 2022 թ.-ին կազմել է 5,4 միլիոն, որից միջազգային ուղևորների այցելությունների թիվը կազմել է 4,7 միլիոն։ Միջազգային ուղևորների ժամանումների թիվը 2021 թ.-ի համեմատ 2,9 անգամ ավելի է եղել, իսկ միջազգային ուղևորների այցելությունների թիվը՝ 2,7 անգամ։

Ըստ Վրաստանի Ազգային վիճակագրության գրասենյակի՝ 2022 թ.-ին միջազգային զբոսաշրջիկներից ստացված գումարը 2021 թ.-ի համեմատ աճել է 182,5 %-ով: