Թուրքիայի նախագահ Ռեջեփ Թայիփ Էրդողանը շնորհակալություն է հայտնել բոլոր երկրներին, որոնք օգնություն են ցուցաբերել Թուրքիային ավերիչ երկրաշարժերից հետո, հայտնում է Anadolu գործակալությունը։
ԱՄԷ-ի նախաձեռնությամբ կազմակերպված Համաշխարհային կառավարական գագաթաժողովի մասնակիցներին ուղղված տեսաուղերձում նա նշել է, որ «Թուրքիան չի մոռանա դժվար պահին իրեն մեկնած օգնության ձեռքը»։
«Պետությունների մի մասը փրկարարներ ուղարկեցին Թուրքիա, մի մասը համերաշխություն դրսեւորեցին՝ նախաձեռնելով օգնություն հավաքելու արշավներ։ Որոշ պետություններ հանդես եկան Անկարային աջակցելու հայտարարություններով։ Այս աղետը ևս մեկ անգամ ապացուցեց միջազգային համերաշխության նշանակությունը»,- ասել է Թուրքիայի նախագահը։
Նա հավելել է, որ Թուրքիայում 13,5 միլիոն մարդ զգացել է երկրաշարժերի հետեւանքները։ «Գիտնականները հայտարարել են, որ այդ ցնցումների էներգիան հավասարազոր է 500 ատոմային ռումբերի պայթյունին»,- ասել է Էրդողանը։
Նրա խոսքով, Թուրքիան բախվել է ոչ միայն իր պատմության, այլեւ մարդկության պատմության մեջ ամենամեծ բնական աղետներից մեկին։
