Փաշինյանի մոտեցումները բավականին հասկանալի էին եվրոպական ականջին․ Իոաննիսյան

Եկեք արձանագրենք, որ երեկվա բանավեճը, մեզ համար, վատը չէր և Փաշինյանի մոտեցումները, մեծ հաշվով, բավականին հասկանալի էին եվրոպական ականջի համար:

Այս մասին «Ֆեյսբուք»-ի իր էջում գրառում է կատարել «Իրազեկ քաղաքացիներ միավորում» ՀԿ համակարգող Դանիել Իոաննիսյանը՝ անդրադառնալով տարածաշրջանում անվտանգային հարցերով երեկ Մյունխենում կայացած հանդիպմանը:

«Բայց մի հետաքրքիր բան նկատվեց. ժողովրդավարության ու խաղաղության մասին Փաշինյանի թեզերը հակադրվում էին Ալիևի՝ «օկուպացիայի դեմ պայքարին» ու «ուռա-հայրենասիրությանը»… Քոփի-փաստ Զելենսկու բառերով: Ու սա նշանակում է, որ Ալիևը փորձում է եվրոպացիների աչքում Ադրբեջանի իրավիճակը նույնացնել Ուկրաինայի հետ:

Ցույց տալ, որ ադրբեջանցիք ևս պայքարում են ապօրինի օկուպացիայի դեմ ու բացի ուժից չունեն այլ ճանապարհ: Այդ պատճառով, կարծում եմ, քննարկման ժամանակ արժեր նշել, որ խաղաղության մասին սիրուն խոսող Ալիևը մի քանի ամիս առաջ չսադրված հարձակում գործեց Հայաստանի վրա…

Ընդգծելով, որ Ադրբեջանն ու Ուկրաինան շատ տարբեր են: Հ.Գ. Տարօրինակ էր նաև այն, որ Ալիևը չխոսեց Ղարաբաղում ականների տեղադրման իր սիրած թեզի մասին:

Իսկ մզկիթների ոչնչացման մասին իր մեղադրանքին հազար ու մի ավելի լավ ու ընկալելի պատասխան կարելի էր տալ (օրինակ, որ մենք Աղդամի մզկիթը վերանորոգեցինք, իսկ իրենք քանդում են Շուշիի Ղազանչեցոցը)»,- հավելել է Իոաննիսյանը: